गोंदिया जिल्ह्यात जिओ नेटवर्क ठप्प; दोन दिवसांपासून ग्राहक त्रस्त, तीव्र नाराजी.

Digital Gavkari news
Durgaprasad gharatkar

गोंदिया (महाराष्ट्र):  गेल्या दोन दिवसांपासून गोंदिया जिल्ह्यातील काही भागांमध्ये जिओ सिम कार्डचे नेटवर्क पूर्णपणे बंद असल्याची तसेच अनेक ठिकाणी ‘नो सर्व्हिस’ची समस्या निर्माण झाल्याची माहिती समोर आली आहे. अनेक नागरिकांना कॉल करता येत नाहीत, तर इंटरनेट सेवा अत्यंत मंद गतीने चालत असल्यामुळे दैनंदिन कामकाज ठप्प झाले आहे. विशेषतः ऑनलाइन व्यवहार, UPI पेमेंट, OTP व्हेरिफिकेशन, शासकीय व बँकिंग सेवा यावर परिणाम होत असल्याने नागरिकांमध्ये तीव्र नाराजी व्यक्त होत आहे.

स्थानिक नागरिकांच्या मते, मोबाईलमध्ये सिग्नल दिसत असला तरी इंटरनेट स्पीड अत्यंत कमी आहे. काही गावांमध्ये पूर्णपणे नेटवर्क गायब असल्याने विद्यार्थ्यांचे ऑनलाइन शिक्षण, व्यावसायिकांचे व्यवहार तसेच घरून काम करणाऱ्या कर्मचाऱ्यांचे कामकाज प्रभावित झाले आहे. दोन दिवस सतत ही समस्या सुरू असल्याने लोकांना आर्थिक नुकसान सहन करावे लागत असल्याची तक्रार करण्यात येत आहे.

दरम्यान, जिओचे रिचार्ज प्लॅन तुलनेने महाग असतानाही योग्य सेवा मिळत नसल्याने अनेक ग्राहकांनी दुसऱ्या मोबाईल नेटवर्ककडे सिम पोर्ट करण्याचा विचार सुरू केला आहे. “महागडे रिचार्ज करूनही नेटवर्क नीट मिळत नाही, त्यामुळे दुसरा पर्याय निवडण्याशिवाय पर्याय नाही,” अशी भावना काही नागरिकांनी व्यक्त केली आहे.

या पार्श्वभूमीवर संबंधित कंपनीने तात्काळ दखल घेऊन नेटवर्क समस्या दूर करावी व ग्राहकांना स्थिर आणि सुरळीत सेवा उपलब्ध करून द्यावी, अशी मागणी गोंदिया जिल्ह्यातील नागरिकांकडून करण्यात येत आहे.